حبات الماس


تتساقط حبات المطر على نافذتى

فتطرقها كعادتها

فاشعر بها وأراها تلمع كحبات الماس

فأنهض من فراشى مسرعه

افتح لها نافذتى

استنشقها اتركها تداعب يدى

فاشعر بحنينها وتشعر بلهفتى

كم اعشق تلك القطرات وانتظرها

ارتدى ملابسى فى لهفه

اتجه الى الطرقات

اركض واركض فتزداد هى زخاتها

تحتضنى واحتضنها

اجدها تزيل عنى ذكرياتى القديمه بكل مر فيها

تجدد الأمال فى قلبى

تعود ذكرياتى الجميله

فاتذكر اغنيات الطفوله

عند هطول المطر

يا مطرة رخى رخى

على قرعه بنت اختى

الدنيا برد الدنيا برد

وعم خليل بيشم الورد

اجدنى ارددها بصوت عالى

يدوى فى الطرقات الخاليه

فقط صوتى وصوتها

انا اغنى وهى تعزف

اتراقص فى الطرقات

اشتم رائحه الطين الممزوج بانفاس الريح

أدور وأدور فتدور معى الدنيا

اتمنى الا تتوقف

حتى اتلذذ بأخر حبة ماس تداعب وجه طفولتى

فأشعر بالحريه والسعادة

يا هتجنن...يا هتجنن



دار بينى وبين احدى لاصدقاء نقاش مطول وكبير عن الحجاب ونظرة الدين للمرأة وان الدين مش كل فروعه جسم المرأة وان فى قضايا اكبر من كدا لازم نبحث فيها افضل من اننا نشوف جسم المرأة عورة والا لا!!
انا من فترة وانا عندى بلبله جامدة جدا فى دماغى من ناحيه الدين والحرام والحلال
دماغى عماله تشطح بقالها فترة ووصلت لدرجه ان تفكيرى قادنى الا ان احنا اتخلقنا ليه؟؟
اتخلقنا علشان نعبد ربنا
طيب تمام ...ليه الفتن اللى بتحاوطنا بالشكل دا...ولو ربنا احن علينا من امنا ازاى سايبنا للفتن دى
هتقولولى لا ربنا مش بيسيبك ربنا بيبعتلك رسايل والذكى اللى بياخد بالله منها
طيب وبفرض انى مش ذكيه او ان دى قدراتى العقليه او انى بتصرف بحسن نيه تماما
ربنا بيوريكى علمات ايه الحرام وايه الحلال
طيب لو كان كدا فعلا لو ليا عقل اصلا مش هعمل حاجة حرام اصلا
لا مهو مفيش حد مش بيغلط الانبياء بس هما المعصومين
طيب وليه اتحط فى كل الاختبارات دى من اساسه ليه اكون فى الصراع النفسى دا فين رحمه ربنا !!!
مش دا بس طبعا اللى توصلتلوا دماغى العبقريه
انا دماغى شاطحه لابعد من كدا بس مش عاوزة افتح اوى علشان محدش يتفتن هو كمان
من 3 سنين تقريبا
كنت بحلم برؤى كتيرة جدا وسبحان الله رؤيه منهم كانت سبب فى انى التزم بالحجاب
اخر حلم حلمته وبعد كدا الرؤى وقفت معايا تماما
كانت رؤيا فسرها ليا احد الشيوخ على النت انى هتعرض لفتنه قويه جدااااااااااا بس ربنا هينجينى!!
انا بقالى سنتين مفتونه ودماغى مش بتقف عن التفكير وسبحان الله على اد ما انى مكنتش واثقه اوى فى التفسير الا انه اتحقق
طبعا النقاش اللى دار بينى وبين اصحابى هزنى اكتر ما انا مهزوزة
فى حاجات جوايا بتعد ثوابت مكنتش بتتغير ابدا
بدأت اتهز فيها
والمشكله انى للاسف الشديد فقدت الثقه تمامااااااااا فى الشيوخ اللى موجودة
احنا منقسمين اوى دى شيوخ سلفيه او وهابيه
ودول اخوان
ودول صوفيه ووووو
احيانا بقعد اقول يا الله هو انا المفروض اسمع لمين واتبع مين
المفروض انك تتبعى كتاب الله وسنه الرسول
طيب انا اجتهد مثلا اقرا واجتهد لوحدى
لا طبعا مينفعش انك تجتهدى انتى مش اهل لكدا انتى محتاجه حد بفهمك ويعلمك
طيب مهو انا مش واثقه فى اى حد وخايفه خايفه بجد
انا كنت فى فترة مع الفكر السلفى بتعلم منهم وبتبع علمائهم
حسيت ان دماغى تجمدت وانى ببص للامور من وجهه نظر قرون مش نظرة حديثه
وان كمان كان عندى مشكله من وجهه نظرهم انى بحب استفسر عن كل حاجة ودا ليه ودا امتى طيب مهو ممكن يكون كذا كانوا بيقولولى بطلى جدال قولى سمعا وطاعه هو دا اسلامنا!!!
وانا كنت بحس انى كدا همشى وراى اى حاجة وخلاص لا انا مش كدا خااالص
هو مش عيب فى الفكر السلفى نفسه ولكن هو يمكن عيب فى علمائه او بيوصل لينا ازاى
اتجهت فترة للصوفيه وكنت بسمع من شيخ طريقه واتناقشت معاه كتير جدا حسيت انه هزنى زيادة لان كل كلمه اقولهاله يقولى دا كلام الوهابيه
دول غسلين دماغك
وكاد ان يقول لى انتى هالكه وداخله النار!!!!
رغم انى كل اللى ناقشته فيه ان التبرك باشيوخهم يعد شرك اصغر كلام كتير كدا ممكن اعمل عليه تدوينه لوحده
جيت للاخوان قرأت شويه عنهم وسمعت للشيخ القرضاوى وتعاملت مع اخوانيه حسيت انهم مسايرين العصر وانهم اقل جمودا من السلفيه بس لقيت نقد كتير ليهم جدا وعن البنا وكلام يقلق
طيب وبعدين!!!!
وعلى فكرة كمان انا كنت اعرف شيعه وكنت بسمع منهم بردوا
بس لقيت انهم شاطحين اوى لسب صحابه ودا انا واثقه مليون الميه انه حرام وانه مش هيودى اللى الله اعلم النار
حاسه انى فى بحـــــــــــــــــر واســـــــــــــــــــــــــــع وانا عماله اعوم وامشى كل شويه مع تيار على امل انى اوصل للشط ولكن الشط دا ملوش وجود انا فى الوسط وممكن اغرق
فى الاخــــــــر بئا انا قررت ايه ...قررت انى اصلى واصوم واقفل على نفسى قوقعتى مسمعش لحد والا اسأل حد ويمكن كمان معرفش حد اصلا
يا ما هتجنن لو سيبت نفسى او هلحد فى الاخر

رفيق دربى


احيانا كثيرة اشعر بحنبن اليك ...بل دائما...

فلكم اشتاق الى ان اتحدث اليك الى ان اشكو ..وانت تنصت ..

ان اعلن عن تذمرى.. وانت تسمعنى دون تذمر ...تساعدنى على ان اخرج ما بنفسى من حزن

اتذكر كم اهملتك وتركتك فكنت اشكوا اليك حزنى..وابكى.. اقذف اليك بكلماتى وانت تحتضنها بسعه صدرك ..

وعندما انتهى ويتبدل حالى اتركك مهمل ولا استعيرك اهتمام لايام وشهور

اتذكر الان نظرتك الي تلومنى تقول لى الم أن لكى ان تلقين بالتحيه ان تعودى لى.. ان تتحدثى معى

فانظر اليك بسخريه من انت كى القى اليك التحيه ...فانا اتحدث اليك عندما اهوى فقط

كم كنت قاسيه عليك .كنت كاتم اسرارى الاول والاخير... فلم اخجل يوما من اخبارك بما اريد او افعل
بل كنت ازداد جرأة معك فلا اخجل او اخاف

فأنت الصدر الحنون الذى احتوانى ...نعم ...كنت تسكن معى بيتى وغرفتى

ولكنك ابدا لم تزعجنى يوما بل كنت انا من يزعجك

كنت اضعك بين ما هو قديم امتلكه

كنت دائما اتخلى عنك...وانت لم تتخلى عنى يوما

فلكم اشتاق لك اليوم ولكم اندم على هجرك

ليتك تسامحنى وتغفر لى ليتك تعود الى من جديد

فأن عدت فلن اهملك مرة اخرى مهما حدث

فانت تحمل بين طياتك ماضى بألمه وفرحه

انت من تؤنسنى فى وحدتى

انت من تهون على حزنى

انت من يشاركنى افراحى

لم ولن تكن فى ذاكرة النسيان

بل فى ذاكرة الحاضر والمستقبل

عود الى يا دفتر احزانى وافراحى

عود الى يا كتيبى الحبيب القديم الصديق

يارفيق دربى

لكم الله يا فقراء المسلمين






مش عارفه أبدأ ازاى الكلام...كعادة الفترة اللى فاتت من حياتى دى الكلام تايه عن ايدى خالص ...وبقول ايدى علشان الكلام بيكون فى دماغى اول ما ابدأ اكتبه ماشاء الله بيتبخر والاقى دماغى فضيت فجأة...المهم ما علينا



اللى انا عايزة اقوله حاسه انى مقهورة اوى والله العظيم وحاسه انى متكتفه جدا ليه بئا مقهورة هقولكم... زوجى العزيز قرر انه يعزمنى على العشاء بصحبه قريب له هو وزجته المهم روحنا مطعم سمك الاكل فيه تحفه والمطعم دا عبارة عن أوبن بوفيه فى طبق رئيسى فى الاول وبعد كدا بيتفتح البوفيه الفاخر مع جميع انواع السلاطات والحلويات الخ....



المهم يعنى انى طبعا مقدرتش اكل كالعادة لانى اكلتى صغيرة حبتين فيدوب اكلت الطبق الرئيسى وجربت السلطات لانها كلها ماكولات بحريه ومقدرتش اكتر من كدا ...كنا قاعدين بنتكلم وبمناسبه اننا بنتعشى وان الاكل كتير فوجئت ان قريب زوجى بيقولى



تصدقى ان اللى بيبقى من الاكل دا فى الاخر بيترمى!!!!!



قولتله نعم!!!



قالى اه طبعا الاكل اللى بيتعمل هنا فى اى مطعم اللى بيتبقى منه بيترمى قولتله بسزاجه طيب ويترمى ليه مهو ممكن انه يروح لناس اللى شغلين فى المطعم مثلا مش فقراء واخدين بالكم



قالى لا طبعا لو اتظبط واحد هنا بياكل من اكل بعد ما برد بيطرد.....انا جالى حاله اسبهلال قولتله كل الاكل دا بيترمى ازاى يعنى قالى هو كدا قالى كمان ان فى المطاعم التانيه زى ماكدونالز او بيتزا او كنتاكى وباقى السلسه دى لو اتبقى فيها اكل مصيره فى النهايه الزباله



حسيت انى الاكل وقف فى زورى واضايقت جدا جدا سبحان الله العظيم فى ناس مش لاقين لقمه عيش حااااااف وهنا بيترمى اكل افخر انواع وكتير جدا طيب ليه ميتعملش زى الجمعيه اللى عندنا فى مصر للاسف الشديد مش فاكرة اسمها بياخدوا ما تبقى من اكل الفنادق ويروح للفقراء انا عارفه ان دا اكيد مش صحى اوى وان الافضل ان الاكل ميتسخنش تانى بس ما احنا كلنا بنعمل كدا فى بيوتنا وعايشين يعنى محصلناش حاجة وبعدين مرض يجى من اكل يتسخن على المدى الطويل احسن من موت من الجوع وحزن وحسرة ملهاش حدود
اللى عرفته بئا كمان ان هنا عندهم تقليد انهم يروحوا السوبر ماركت ممكن الرجل يخرج بى 3 عربيات ملينين اكل من كل الانوااااااااااااع بيااخد كفايته هو وعائلته وفى الاخر بيترمى وكفايته دى حضراتكم لا تتعدى ربع العربيه الواحدة لانهم بياكلوا بره كتير جدايعنى الاسراف مش بس فى المطاعم فى بيوتهم كمان ...اهم حاجة عندهم ان لو جى لهم ضيوف يكون فى اكل واكل كتير جدا كمان مش مهم هياكلوا او لا المهم ان فى اكل وكتير وفى الاخر يترمى عاااااااااااااااااااا
انا بسزاجتى قولت طيب فى مصر مش لاقين كتير ياكلوا المفروض بئا اننا نصدر لهم الاكل دا كان هاين عليا الم الاكل دا كله ابعته للناس الفقيرة فى مصر وماشيه وانا بتحسر على الخير دا كله اللى نهايته فى بسكت الزباله وبعدين وانا فى العربيه قولت والله تصدقى انك عبيطه مصر ايه اللى بتفكر فيها على الاقل فى ناس هناك اى نعم مش لاقين ياكلوا بس على الاقل مفيش حد بينام من غير عشى وربنا بيرزقهم ازاى انتى مفكرتيش فى الصومال والنيجر والبلاد التانيه دى اللى بياكلوا الشجر وفعلا بيموتوا من الجوع او عسر الهضم فين حقهم من الخير دا والله انى بقيت احس انى بتسمم الاكل



ربنا قال :وكُلُواْ وَاشْرَبُواْ وَلاَ تُسْرِفُواْ إِنَّهُ لاَ يُحِبُّ الْمُسْرِفِينَ



دا مش اصراف دا والله اكتر من الاصراف بكتييييييرالموقف دا فكرنى كمان انى كنت فى رمضان متابعه برنامج خواطر شاب على mbc وكان بيجى وقت الفطاروكنت بفطر وكان فى حلقه عن الاسراف وعن الناس اللى بتموت من الجوع قومت وسيبت الاكل وكنت حاسه انى مش قادرة اشرب حته بوق ميه احنا بناكل ببزخ وبنتأمر وبنرمى اكل كتير منا يقول بحب دا ومش بحب دا انا نفسى فى مشوى والا محمر والا مش عارفه عايز الرز يكون عامل ازاى وزوج يتخانق مع زوجته علشان مفيش 3 اصناف على الاكل ومش عارف الملح ناقص ازاى يا الله احنا فين من الناس دى احنا فين من المسلمين اللى بياكلوا من الزباله احنا فين من المسلمين اللى بيموتوا لانهم مش لاقين ورق شجر ياكلوه هو احنا مش مطلوب منا كمسلمين بجانب العبادات اننا نساعد اخونا المسلمين ...والا احنا بس نساعدهم فى سلاح وحرب وننسى الناس التانيه دى.... الاكل شىء اهم من السلاح لان لو مفيش ناس عايشه تشيل السلاح دا يبقى السلاح بلا قيمه
انا بئا فكرت انى اعمل شركه واخد الاكل اللى بيتبقى دا واوزعه على فقراء الدول الاسلاميه



:Dطبعا الموضوع مكلف جدا جدا لابعد الحدود بس املى فى ربنا كبير انه يرزقنى علشانهم مين يشترك معايا :D:D:D:D:D






عندى اقتراح كمان لينا كلنا نقدر ننفذه ايه رأيكم الاكل اللى يتبقى مننا بدل ما يترمى او يتحط فى التلاجه لحد ما يبوظ نسخنه ونلفه كويس وبطريقه جميله ونديه مثلا للبواب او مؤذن المسجد او اى حد غلبان نعرفه او ممكن بدل ما نديهم باقى اكلنا نعمل كقدار واحد زيادة ويكون لحد فقير بس طبعا لازم الاكل يكون نضيف وكويس ونديه زى ما احنا بناكل منه تخيلوا الثواب اد ايه مش لازم نعمل كدا بس فى رمضان احنا ممكن نعمل كدا فى الايام العاديه يارب الاقتراح يعجبكم وتحاولوا تنفذوه




وَضَرَبَ اللّهُ مَثَلاً قَرْيَةً كَانَتْ آمِنَةً مُّطْمَئِنَّةً يَأْتِيهَا رِزْقُهَا رَغَدًا مِّن كُلِّ مَكَانٍ فَكَفَرَتْ بِأَنْعُمِ اللّهِ فَأَذَاقَهَا اللّهُ لِبَاسَ الْجُوعِ وَالْخَوْفِ بِمَا كَانُواْ يَصْنَعُونَ ]
تحياتى

 
© 2008 *By Templates para Você*