لكم الله يا فقراء المسلمين






مش عارفه أبدأ ازاى الكلام...كعادة الفترة اللى فاتت من حياتى دى الكلام تايه عن ايدى خالص ...وبقول ايدى علشان الكلام بيكون فى دماغى اول ما ابدأ اكتبه ماشاء الله بيتبخر والاقى دماغى فضيت فجأة...المهم ما علينا



اللى انا عايزة اقوله حاسه انى مقهورة اوى والله العظيم وحاسه انى متكتفه جدا ليه بئا مقهورة هقولكم... زوجى العزيز قرر انه يعزمنى على العشاء بصحبه قريب له هو وزجته المهم روحنا مطعم سمك الاكل فيه تحفه والمطعم دا عبارة عن أوبن بوفيه فى طبق رئيسى فى الاول وبعد كدا بيتفتح البوفيه الفاخر مع جميع انواع السلاطات والحلويات الخ....



المهم يعنى انى طبعا مقدرتش اكل كالعادة لانى اكلتى صغيرة حبتين فيدوب اكلت الطبق الرئيسى وجربت السلطات لانها كلها ماكولات بحريه ومقدرتش اكتر من كدا ...كنا قاعدين بنتكلم وبمناسبه اننا بنتعشى وان الاكل كتير فوجئت ان قريب زوجى بيقولى



تصدقى ان اللى بيبقى من الاكل دا فى الاخر بيترمى!!!!!



قولتله نعم!!!



قالى اه طبعا الاكل اللى بيتعمل هنا فى اى مطعم اللى بيتبقى منه بيترمى قولتله بسزاجه طيب ويترمى ليه مهو ممكن انه يروح لناس اللى شغلين فى المطعم مثلا مش فقراء واخدين بالكم



قالى لا طبعا لو اتظبط واحد هنا بياكل من اكل بعد ما برد بيطرد.....انا جالى حاله اسبهلال قولتله كل الاكل دا بيترمى ازاى يعنى قالى هو كدا قالى كمان ان فى المطاعم التانيه زى ماكدونالز او بيتزا او كنتاكى وباقى السلسه دى لو اتبقى فيها اكل مصيره فى النهايه الزباله



حسيت انى الاكل وقف فى زورى واضايقت جدا جدا سبحان الله العظيم فى ناس مش لاقين لقمه عيش حااااااف وهنا بيترمى اكل افخر انواع وكتير جدا طيب ليه ميتعملش زى الجمعيه اللى عندنا فى مصر للاسف الشديد مش فاكرة اسمها بياخدوا ما تبقى من اكل الفنادق ويروح للفقراء انا عارفه ان دا اكيد مش صحى اوى وان الافضل ان الاكل ميتسخنش تانى بس ما احنا كلنا بنعمل كدا فى بيوتنا وعايشين يعنى محصلناش حاجة وبعدين مرض يجى من اكل يتسخن على المدى الطويل احسن من موت من الجوع وحزن وحسرة ملهاش حدود
اللى عرفته بئا كمان ان هنا عندهم تقليد انهم يروحوا السوبر ماركت ممكن الرجل يخرج بى 3 عربيات ملينين اكل من كل الانوااااااااااااع بيااخد كفايته هو وعائلته وفى الاخر بيترمى وكفايته دى حضراتكم لا تتعدى ربع العربيه الواحدة لانهم بياكلوا بره كتير جدايعنى الاسراف مش بس فى المطاعم فى بيوتهم كمان ...اهم حاجة عندهم ان لو جى لهم ضيوف يكون فى اكل واكل كتير جدا كمان مش مهم هياكلوا او لا المهم ان فى اكل وكتير وفى الاخر يترمى عاااااااااااااااااااا
انا بسزاجتى قولت طيب فى مصر مش لاقين كتير ياكلوا المفروض بئا اننا نصدر لهم الاكل دا كان هاين عليا الم الاكل دا كله ابعته للناس الفقيرة فى مصر وماشيه وانا بتحسر على الخير دا كله اللى نهايته فى بسكت الزباله وبعدين وانا فى العربيه قولت والله تصدقى انك عبيطه مصر ايه اللى بتفكر فيها على الاقل فى ناس هناك اى نعم مش لاقين ياكلوا بس على الاقل مفيش حد بينام من غير عشى وربنا بيرزقهم ازاى انتى مفكرتيش فى الصومال والنيجر والبلاد التانيه دى اللى بياكلوا الشجر وفعلا بيموتوا من الجوع او عسر الهضم فين حقهم من الخير دا والله انى بقيت احس انى بتسمم الاكل



ربنا قال :وكُلُواْ وَاشْرَبُواْ وَلاَ تُسْرِفُواْ إِنَّهُ لاَ يُحِبُّ الْمُسْرِفِينَ



دا مش اصراف دا والله اكتر من الاصراف بكتييييييرالموقف دا فكرنى كمان انى كنت فى رمضان متابعه برنامج خواطر شاب على mbc وكان بيجى وقت الفطاروكنت بفطر وكان فى حلقه عن الاسراف وعن الناس اللى بتموت من الجوع قومت وسيبت الاكل وكنت حاسه انى مش قادرة اشرب حته بوق ميه احنا بناكل ببزخ وبنتأمر وبنرمى اكل كتير منا يقول بحب دا ومش بحب دا انا نفسى فى مشوى والا محمر والا مش عارفه عايز الرز يكون عامل ازاى وزوج يتخانق مع زوجته علشان مفيش 3 اصناف على الاكل ومش عارف الملح ناقص ازاى يا الله احنا فين من الناس دى احنا فين من المسلمين اللى بياكلوا من الزباله احنا فين من المسلمين اللى بيموتوا لانهم مش لاقين ورق شجر ياكلوه هو احنا مش مطلوب منا كمسلمين بجانب العبادات اننا نساعد اخونا المسلمين ...والا احنا بس نساعدهم فى سلاح وحرب وننسى الناس التانيه دى.... الاكل شىء اهم من السلاح لان لو مفيش ناس عايشه تشيل السلاح دا يبقى السلاح بلا قيمه
انا بئا فكرت انى اعمل شركه واخد الاكل اللى بيتبقى دا واوزعه على فقراء الدول الاسلاميه



:Dطبعا الموضوع مكلف جدا جدا لابعد الحدود بس املى فى ربنا كبير انه يرزقنى علشانهم مين يشترك معايا :D:D:D:D:D






عندى اقتراح كمان لينا كلنا نقدر ننفذه ايه رأيكم الاكل اللى يتبقى مننا بدل ما يترمى او يتحط فى التلاجه لحد ما يبوظ نسخنه ونلفه كويس وبطريقه جميله ونديه مثلا للبواب او مؤذن المسجد او اى حد غلبان نعرفه او ممكن بدل ما نديهم باقى اكلنا نعمل كقدار واحد زيادة ويكون لحد فقير بس طبعا لازم الاكل يكون نضيف وكويس ونديه زى ما احنا بناكل منه تخيلوا الثواب اد ايه مش لازم نعمل كدا بس فى رمضان احنا ممكن نعمل كدا فى الايام العاديه يارب الاقتراح يعجبكم وتحاولوا تنفذوه




وَضَرَبَ اللّهُ مَثَلاً قَرْيَةً كَانَتْ آمِنَةً مُّطْمَئِنَّةً يَأْتِيهَا رِزْقُهَا رَغَدًا مِّن كُلِّ مَكَانٍ فَكَفَرَتْ بِأَنْعُمِ اللّهِ فَأَذَاقَهَا اللّهُ لِبَاسَ الْجُوعِ وَالْخَوْفِ بِمَا كَانُواْ يَصْنَعُونَ ]
تحياتى

23 comments:

oceaneyes said...

بجد بجد جزاكى الله خيرا على الموضوع الحلو ده
ماعندكيش ادنى فكرة قد ايه ماحدش بيفكر فى الناس دول نتيجة لهموم الحياة ومشاغلها ....

كفاية صورهم اللى بجد تقطع القلب ...انا مش بقدر اشوف الصور دى ...لانى لما بشوفها بكتئب بجد ...بحس ان مافيش حاجة فى ايدى اقدر اعملها ...ولو حتى عملت حاجة فهى ولا حاجة بالنسبة للى المفروض يتعمل

....

صح فى منظمات كتيرة اوى بتهتم بيهم سواء دولية او محلية ..بس انا مش شايفة اى تقدم ..

....

ربنا يقدرنا على فعل الخير ليهم ويصبرهم على ما ابتلاهم

....

وبجد ربنا هايحاسب الناس اللى مستهترين بنعمته
واللى غيرهم مش لاقيها

...

جزاكى الله كل خير مرة اخرى

:)

Tamer Nabil Moussa said...

موضوع مهم

الاكل دة المفروض يتجمع ويتوزع عن طريق ما للناس الفقراء

حرام بجد يترمى ولاستفاد بية حد


اشكرك على الموضوع القيم

تحياتى

عصفور المدينة said...

السلام عليكم
أنا طبعا رحت كل المطاعم اللي حضرتك بتتكلمي عليها
:)
وتأذيت مثلك من هذا المنظر ولكن حضرت عزومات في منزل الملتزمين من الكويتيين ورأيتهم كيف يجمعون ما تبقى وكيف يغلفونه بشكل جيد ويذهبون به للفقراء
وقد دعاني أحدهم في مطعم فطلب لي طعاما كثيرا وطلب لنفسه عينات

وامتدادا لتعليقي في التدوينة السابقة أدعوك وزوجك لزيارة اللجان المشار إليها هناك في السالمية فقد رأيت نشاطهم

وعلى فكرة ما تحلميش كثير بمصر
عشان الخيرين في الكويت عرضوا مساعدات كثيرة ومساعدات ضخمة جدا على مصر ومصر رفضت وكان الرد نحن نقبل مساعدات من دول لا من أشخاص أو جمعيات

Anonymous said...

الاســـــــــد يعلق


الله أكبر ما شاء الله علي الرغم من البوست الذي ألمني جدا عن احوالنا كمسلمين الا اني في غاية السعادة ان من المسلمين من احتفظ بقلب حي وموقفك هذا ذكرني بموقف الرسول صلي الله عليه وسلم عنما شرب كوبا من الماء البارد ثم قرأ ثم لتسئلن يومئذ عن النعيم


في مصر بنك الطعام موجود وفي مناطق تانية بتتطبق فكرة اعطاء الطعام للمحتاجين


وفي الكويت سيتم بعون الله ثم جهوك بنكا مشابها للطعام ايضا


اصل الافترا وحش جدا أمه محتاجه صحوة دعويه


اوعي تكسلي يا رينا


علي رأيك الاسلام مش عبادات صلوات فقط


اللي انتي بتفكري فيه ده من صميم الاسلام



ربنا يعزك بالاسلام ويكرمك ويجعل قلبك دايما حي

بجد معني جميل جدا
كان غايب عني او كنت ناسيه لان الف النعمة بيخلينا ننسي للاسف

الله يبارك فيكي وفي دعوتك للخير

الطائر الحزين said...

حسبنا الله ونعم الوكيل
اللهم انا نعوذ بك من غنى يطغينا

او ان تزرع فى نفوسنا لا مبالاة واسراف

اسمعى كلام مهندس عصفور احتك هناك كثير

تحياتى

mohand said...

السلام عليكم

طبعا كلامك مفروض كلنا نفكر فيه ونعمل بيه

بس البنوك دي مش بتوصل لكل الفقراء ولا بتروح لكل اللي معاهم

ولو اني مش عارف حكاية انهم بياخدوا من المطاعم والفنادق الكبيره دي
بس من شغلي في الغردقة اعتقد ان ميقدروش ياخدوا من هناك حاجه
برغم من ان اللي بيترمي كتير قوي


انا كنت شغال في الغردقه
بس اللي بياكل من المطعم من الناس اللي شغالين
بيتشيك
يعني بيتكتب عليه شيك بوجبة يدفعة من مرتبة
ممكن يكون مرتبة 220 جنيه
وتمن الوجبه 50 جنيه
تخيلي بقي العجز اللي بيحصل

بس هما بيقولوا انهم بيعملوا كده
علشان محدش من الكاست يسرق حاجه
يترمي افضل من ان اللي شغالين يسرقوه

وكان فيه مديرة مطاعم
اخترعت فكرة جميله قوي
كانت هي والشيف الرئيسي المان
بقوا كل يوم يقولوا ان الاكل فيه خمرا ولحم خنزير علشان الناس تخاف تاكل يعني

انا خرجت عن الموضوع

الموضوع محتاج تفكير في كيفية الوصول للناس دي

سندباد said...

جزاكي الله خيرا
ربنا يجعله في ميزان حسانتك ولكم من يعي ويفهم
تحياتي الخالصة

أبو أمك said...

ربنا اغفر لنا تقصيرنا في حقهم
وتفريطنا في جنبهم
بقولك إيه ؟ مالقيش عندك طبق رز بلبن زيادة ؟

Anonymous said...

جزاكم الله خيرا يا رينا

وان شاء الله نحاول


الصور مؤلمة جدا

ياللا يمكن قلوبنا تتحرك وافعالنا كمان

Yassmina said...

والله مش عارفا ااقولك ايه
بس فعلك ليكي الاجر والثواب من عند ربنا على الاقتراح ده
والحمد لله فالبيت بنحرص ديما على كده
اما بقى بالنسبة للكويت واسراف الكويتين
فدي حاجه مفروغ منها انا عايشه فالكويت زيك بردو من ايام ثانوي
وعمري ما شفت شعب مسرف وبخيل فنفس الوقت زيهم
بس بردو ارجع واقول في شخصيات وناس كتير منهم بيراعو الحتة فعلا
بس عامة هما فعلا مسرفين
ودي نقطه ديما بتكلم عليها انا وصحابي
عموما تستهالي خير على اقتراحك

The Manager said...

معاكي حق في كل كلمة

محدش بيهتم بأخوه المسلم ولا حتى اخوه الإنسان

كل واحد دماغه فى نفسه وبس ... وعايز يشبع وبس

ورمي الأكل فى الزبالة مع منع محتاجينه لأي شئ منه .. فى نظري جشع وشر كبير اصاب النفوس فى عهدنا الحالي ... بل ممكن يكون مرض نفسي ونقص ... لا ادري ما سبب كل هذا الإفتراء على المحتاجين

عندنا فى مصر هنا كما ذكرتى (بنك الطعام) وله موقع وله وسائل للتبرع بكافة الأشكال ... وفي ناس بتحب الخير زيك كدة كتير ... لكن الأكتر منهم هؤلاء المرضي إللى ولا بيرحموا ولا يسيبوا رحمة ربنا تنزل
بجد الموضوع دة بيغيظني جدا وبشوفه وبيتكرر معايا وقدامي فى حاجات كتير مش فى الأكل بس

دة والله افتراء
وللأسف النفوس بتزداد سوء كل يوم وحقد ومش عارف اقول اللهم لا تعاملنا بما فعل السفهاء منا
إللى احنا فيه والله من اعمالنا
واخاف ان يأتى علينا يوم يخسف الله بنا الأرض جزاء لشرورنا كما فعل بسابقينا
ربنا يستر

وكل واحد المفروض يبدأ بنفسه ويحط نفسه مكان الفقير
دى غير اننا نبطل إسراف شوية

العملية مش ناقصة

جزاكي الله عني خير
مع ان كلامك نزفزني جدا
واسف للنرفزة دي

وتحياتى ليكي
وربنا يكثر من امثالك الذين يحبون الخير ويبذلون ما في وسعهم لأجل الخير

:)

احساس لسه حى said...

عزيزتى
بخصوص المطعم ممكن تطلبى انه يلفهولك وتديه لاى حد فى طريقك تحسى انه غلبان
لاكن المشكله اننا بنقول منظرنا وكلام فاضى مش عارفين ان الشئ ده ثواب كبير
اما بخصوص اكل المطاعم فده محتاج جهد كبير انتى صعب تحقيقيه ابتدى باللى ممكن تحققيه وتقدرى عليه هو لو باقى اكل عندك دايمن تشيليه فى الثلاجه وكل كام يوم لما تنزلى تديه لاى حد غلبان واظن فى الشوارع مليان اطفال وكبار
اما افريقيا والبلاد الفقيره دى فكل غبى وقادر هيتحمل وزر كل طفل يموت من الجوع وطبعا الساسه اللى مش نقصين اوزار تانى
ابتدى بنفسك ووالمشروح خليه يمكن فى يوم تقدرى عليه
سلام

sara said...

الاول بعيدا عن البوست
عاجبني اسلوب كلامك اللي حساه طالع من قلبي ..يعني بتتكلمي كدا بدون ترتيب او تكلف _ بترغي يعني _ وانا بصراحه واحشني رغيك جدا

البوست بقي ... طبعا بعيدا عن الصور اللي توجع القلب اللي حضرتك حطاها _ وانتي عرفاني واحدة حسيسه والحجات دي بتوجعلي قلبي _ حلوة فكرة الجمعيه دي بس هي مش هاتبقي مشكلة التكلفه اعتقد علي قد ما هاتبقي مشكلة الاجراءات .. عموما انتي ممكن تعملي اللي تقدري عليه ..يعني مثلا زي مابنعمل هنا ساعات في رمضان اننا نعمل اكل زيادة ونديه للبواب او مؤذن الجامع ..ممكن بردو لما تروحي تاكلي برة بعد كدا تلفي باقي الاكل وتاخديه تيك اواي وتديه لحد غلبان مثلا تكوني تعرفيه ..يعني ممكن تتصرفي باللي ربنا يقدرك عليه ..في كمان بنك الطعام مش عارفه في الكويت عندكم ولا فين ممكن تتبرعيله ..وفي بردو حاجه كدا تبع اليونسيف ممكن تتبرعي لها في حساب البنك ..يعني ليها حل ممكن يخلي ضميرك يرتاح شويه

تعرفي يابت ياميرو احلي حاجه بتعجبني فيكي ايه ..انك ممكن الحلم تحاولي تحققيه ..يعني مش بتبقي واقعيه انك تدركي انه حلم ..بالعكس انتي متفاءلة وبتحاولي انك تحققيه ..يعني انا عارفه انك ممكن تسعي جدا لأنشاء الجمعيه اللي بتقولي عليها دي .. عموما يابنتي انتي اعملي اللي عليكي والباقي علي ربنا

معلش بقي طولت عليكي ..خللي بالك من نفسك وسلامي لبندق

أنسانة-شوية وشوية said...

السلام عليكم وحمة الله وبركاته
انا اول مة ادخل علي مدونتك جميلة جزاك الله خيرا وجعله في ميزان حسناتك الموضوع مهم جدا وحبيت اعفك بفكة فكنا فيها انا وجيانى ونفذناها عملنا حاجة اسمها ثلاجة الخي اشترينا ديب فريزر ووضعناها في مدخل العمارة وعلناله مفاتيح لكل شقة حابة تشترك والاكل اللي بيفيض من كل شقة يتم وضعه في اطباق فل وتغلف باكياس بلاستيك ويتم كتابة اسم الصنف عليه الاقلام متواجده فوق الثلاجة بصفة مستمرة واتفقنا مع احدى السيدات اللواتى لهن دراية بالعائلات البسيطة تاتي يوم في الاسبوع تأخذ الطعام من الثلاجة وتعطيه لمن يحتاجه.
الحمد لله الذي هدانا وما كنا لنهتدى لولا ان هدانا الله . يمكن يكون ده بداية لخير كبير وعلي كة بنك الطعام المصي بيتفق مع الفنادق علي الطعام الذي يتبقي بدون استخدام ويوزعه ايضاً ممكن تدخلي وتتعرفي والله الخير كتير والافكار الحلوة اكتر وان شاء الله الكل يشارك

kaed said...

رينا العزيزة
واللة المفروض يبقى فية جهة مختصة لتوزيع الطعام الزائد عن الحاجة لفقراء المسلمين وخصوصا فى الصومال
واللة المناظر دى بتقطغ القلب

رفقة عمر said...

رينا ازيك عامله ايه
شوفى المشكله الكبيره مش فى الافراد المشكله
فى الدول تعرفى لو القمح مش جاب السعر اللى هما عايزينه يرموه فى البحر بالاطنان
علشان سعرخ يرتفع
بدل ما يدوة للصومال ولا السودان ولا غيرهم من الدول المعدمه
مشكله الدول الفقيره مش الافراد اللى هايحلوها
الخير كتير وربنا لم يخلق انسان الا وخلق له رزقه ولكن اطماع الدنيا هى اللى جعلت فيه ناس معدومين ومش لاقين الاكل
وطبعا كل السبب فى تركهم جوعى حسابهم عند ربهم
وحسبى الله ونعم الوكيل

Unknown said...

مهو ازاي ربنا يبارك لينا و احنا بنرمي النعمه اكيد ده لازم يككون مصيرنا

رينـــــــــــا said...

oceaneyes
--------
جزانا واياكى يا قمر
وسعيدة جدا على تفاعلك مع الموضوع ...يدل على اد ايه انتى انسانه جمييله من جوا
ربنا يكرمك ودايما منورانى
----------------------------------
تامر نبيل
--------
جزاك الله خيرا
وانت عندك حق لازم طبعا يتوزع بس مين يسمع :D
نورتنى
-----------------------------------
استاذ عصفور
----------
وعليك السلام
الحقيقه انا معرفش كويتين لسه طبعا خالص مجرد انى بشوفهم فى الجمعيه او الشارع او المطاعم طبعا
بس اللى بسمعه من ناس معاشراهم بقالهم كتير انهم حتى فى بيوتهم مسفين جدا
وانا سعيدة ان فى منهم امثله من اللى حضرتك ذكرتها

ان شاء الله هروح السالميه
المعلوومه دى زعلتنى جدا سبحان الله افراد ايه وجمعات ايه مش المهم الخيير يوصل وخلاص
معلومه احبطتنى الصراحه
جزاك الله خيرا

رينـــــــــــا said...

الاسد
-----
ايييييييييييوة هو بنك الطعام
مكنتش فاكرة اسمها ..جزاك الله خيرا
انا بحثت على النت عن شىء مماثل هنا فى الكويت
لقيت ان اللى موججود فى لجنه الزكاة وبيكون عبارة عن مؤن يعنى رز وحاجات كدا...وسألأت زوجى بما انه شغال فى وزارة الاوقاف عرفت انه مفيش متطوعات سيدات للاسف الشديد
جزاك الله خيرا على دعائك ولك بالمثل ودايما منورنى
--------------------------------
الطائر الحزين
-----------
حاضر هسمع الكلام :D
يارب دايما مبارك ليى بلوجى بزياراتك :D
----------------------------------
مهند
""""
وعليك السلام
لا حول ولا قوة الا بالله والله حزنت كثيرا للكلام دا
سبحان الله يعنى الزباله اولى من الناس!!!
والله ربنا هيحاسبهم حساب عسير
انت حكيت شىء جديد محزن فى اطار الموضوع بردوا
هو واكيد صعب بس ربنا ييسر ان شاء الله
منورانى

رينـــــــــــا said...

سندباد
""""""
جزانا واياك
اللهم امين
نورتنى
-----------------------------------
أبو امك
-------
اللهم امين يارب
والله يابنى انا مش بطلع اى حاجة زيادة لحد :P:P
-----------------------------------
مصراوى اوى
---------
جزانا واياك
هى فعلا مؤلمه وتوقف الاكل فى الزور حضرتك
الله المستعان

رينـــــــــــا said...

ياسمين
-----
جزانا واياكى يا قمر
انا سعيدة جدا انكم حرصين على دا

ربنا يكتر من امثالكم
تصدقى سبحان الله فعلا
هما مسرفين وبخله فى نفس الوقت
ربنا يكرمك
ونورتينى
-----------------------------------
the manager
-----------انت تتنرفز براحتك يا فندم :D
مين اللى ميشوفش الصور دى وميحزنش والا يتنرفز
بس تعرف لو احنا ابتدينا با انفسنا وكل واحد طبق الكلام دا على نفسه
اكيد الافراد بتكون مجموعات
والوضوع يتحقق
ربنا يستر
جزانا واياك
ودايما منورنى
----------------------------------
احساس لسه حى
------------
هى مش المشكله فى الاكل بتاعى انا بس
انا مشكلتى حضرتك فى الاوبن بوفيه اللى مليان اكل وفى الاخر اللى بيتبقى منه بيترمى
وبالنسبه انى اشوف فقير واديهوله
هنا مش مصر بتشوفهم كدا فى الشارع لا خالص
تصدقى من وقت ما جيت مشوفتش حد فى الشارع متسول
ان شاء الله فى دماغى

رينـــــــــــا said...

نان
"""
عاااااااااااا انا كمان وحشنى ارغى فوق دماغك
هى فعلا اصعب ما فى الموضوع هيكون فى الاجراءات وان استاذ عصفور كمان بيقول انهم فى مصر رفضوا اصلا حضرتك مساعدات من افراد :D
بالنسبه بئا انى اعمل زى مصر الصورة مختلفه يابنتى
البواب هنا اغنى مننا :D
ومفيش حد ممكن اديله او انا لسه معرفتش اماكن لتسريف الحاجات دى
هنا مفيش بنك الطعام على حد بحثى وعلمى
والمكان الوحيد هو لجنه الزكاة وبتقبل مؤن فقط
والفكرة مش مجرد التبرع وبس الفكرة كمان انى مستحرمه الاكل دا كله انه يكون فى الزباله
الله المستعان
انتى عرفانى انسانه خياليه ))
مش بقتنع انا ان الواقع اسود ومهبب لا انا مقتنعه ان الحياه وردى
انتى عارفه بئا :D
يوصل
___________________________________
انسانه شويه شويه
________________
وعليكى السلام
نورتينى جدا وربنا يكرمك على اطرائك
واياكى يارب العالمين
الفكرة دى مش قادرة اقولك اد ايه انبسط منها جدااااااااا
فكرة جديدة ومثمرة جدا
ربنا يجعله فى ميزان حساناتكم
ربنا يقدم لكم اللى فى الخير يارب
نورتينى بجد وان شاء الله تكونى زائرة دائمه :D
----------------------------------
kaed
----
فعلا المفروض بس هما بصين لها من الناحيه الصحيه ان دا ممكن يؤذى الاخرين يعنى
فعلا عندك حق
نورتنى
-----------------------------------
رفقه عمر
--------
الحمد لله رب العالمين لعلك بخير يارب ان شاء الله
انا من وجهه نظرى ان لو الافراد تكاتفوا هيكونوا جماعات والموضوع يكبر وينمو لحد ما نوصل للى احنا عايزينه
حضرتك د بئا مش اسراف
دا جهل وربنا هيحاسبهم حساب عسييييييييييير
نورتينى
-----------------------------------
محمد صبحى
--------
عندك حق جدا

ذو النون المصري said...

يا خبر اسود!!!!!!!!!!!ماساه فعلا ان طفل يموت بسبب نقص الطعام

 
© 2008 *By Templates para Você*