السلام عليكم ورحمه الله وبركاته جميعا
وحشتونى جدا والله وكل سنة وانتم طيبين على عيد الاضحى وعلى العام الجديد وان شاء الله عام جديد سعيد عليكم كلكم يـــــــــــــــارب
الحمد لله رجعت من اجازتى فى مصر وكانت اجازة سعيـــــــــــدة ومثمرة جدا الحمد لله
رغم انهم كانوا تقريبا اسبوعين الا انى حسيت انهم بس يومين .....الموضوع جى مفاجأة ليا لما زوجى شاف نفسيتى فى الفترة الاخيرة مش متظبطه اوى قالى بما اننا مقضناش شهر العسل ايه رأيك نطلع تركيا!!
قولت تمام اهوا تغير وبلد جديدة وهنتفسح وبتاع بس من جوايا قولت ياااااا لو الاجازة دى تحولت الى مصر وكأن زوجى كان بيسمعنى من جوا قالى ايه رايك بدام سفر بسفر تنزلى مصر؟
طبعا دووووووون تفكير صرخت وقلتله طبعاااااااااااااااااااا طيرت من الفرح وسبحان الله لقينا عرض على مصر للطيران وبسرعه بسرعه حجزنا وبسرعه لقيت نفسى فى المطار وكأن ربنا رايد اوى اننا ننزل مصر
انا كمان حبيت اعمل مفاجأة ليهم ومقولتش لحد خاااااالص انى نازله مصر والا اى مخلوق وياريتنى ما عملت كدا
وصلت البيت الساعه 4 ونص الفجر وتخيلوا الحاله اللى كانوا فيها امى كان قلبها هيقف وفضلت تعيط لحد الصبح كلهم كانوا مزبهلين ومخضوضين وبجد مش هعمل كدا تانى لانى خفت عليهم جدا لان منظرهم لا يشجع على اى مفاجأت
الحمد لله الاجازة كانت سعيدة وان كان يشوبها بعض الاشمئزاز...الطيارة وصلت الساعه 2 بالظبط فضلنا واقفين فى الجوازات ساعتين تخيلوا!! ســــــــــــــــاعتيــــــــــــــــــــــــن وكنا اربع طيارات بس وجايين ورا بعض يعنى مش مع بعض طوابير مش بتمشى واسلوب سىء جدا فى المعامله وخرجنا لقينا الشنط مرميه على الارض كأنها كياس زباله والدنيا اتبهدلت وناس بتزعق وتتخانق وتشتم لما شفت المنظر دا اول حاجة قلتها انا عايزة ارجع...واحنا خرجين من هنا كنا 8 طيارات عارفين وقفنا اد ايه فى جوازات ووزن شنط والله ربع ساعه ومعامله فى غايه الاحترام وحاجة كدا تحس انك بنى ادم.. وطبعا كان المقابل اللى شفته اول ما وصلت ..دا غير بئا جمال الطيارة والطيار والمطبات اللى ادبينها والنزول اللى كان قلبى هيقف فيه وطبعا قررنا ان دى اخر مرة ننزل فى مصر الطيرااااااان وتعجبت جدا ان افضل طيران هو طيران مصر للطيران
ما علينا
المهم يعنى انى الحمد لله كنت مبسوطه اوى مع اهلى وامى اللى كانت مش عارفه تعملى ايه والا ايه ومكنتش عايزانى امشى اساسا وطبعا كان لازم ازور حبيبتى اسكندريه قعدنا فيها يومين العيد وكانوا يومين بالاجازة كلها الجو كان رائع وان كان لا يتخلله اعراض الانفلونزا اللى تملكتنى منذ خروجى من المطار واللى اشتدت عليا من مجرد خروجى من القطار بس طبعا مكنش فى اى مجال انى انام اخدت كميه ادويه مهوله من المضادات الحيويه وعدت الحمد لله
بس تعرفوا انا كنت عايزة ارجع مكنتش عايزة اقعد هناك وانا مستغربانى جدا من الاحساس اللى جالى دا انا كنت همووووووووت وانزل ان شالله يوم مجرد ما كام يوم عدوا بقيت اقول لماما انا عايزة بئا اروح بيتى.... ولولا وجود اهلى فقط والناس اللى بحبهم فى مصر انا مكنتش نزلت خالص على فكرة
بجد الموضوع مختلف
اسوء لحظات مرت عليا هى لحظه توديع اخواتى ونان ليا فى المطار كان قلبى هيقف من العياط واخويا الصغير اول مرة اشوفه بيعيط بالشكل دا ومكنش عايز يسيبنى ابدا رغم ان هو بردوا اللى وصلنى اول مرة المطار لما كنت عروسه معيطش خالص كان سعيد ليا جدا المرة دى اتفحم بجد من العياط
واللى ذاد وغطا بئا الاخت نان اتفحمت هى كمان من العياط كنا فتحينها مناحه فى المطار ويعينى جوزى مبقاش عارف يهدينى ازاى وفضل العياط معايا مستمر الى ان وصلت الكويت اول ما وصلت المطار الحمد لله هديت رغم ان لسه جوايا الم
الحمد لله رب العالمين
