حديد عز


انا مش هتكلم عن زيادة الحديد لان متهيئلى الناس صوتها اتنبح فى الموضوع دا

مش هنكر طبعا ان موضوع زيادة الحديد دا استفزنى ومستفزنى لحد دلواقتى وكل ما بنفكر نسأل على اسعار الشقق فى مصر بستفز اكتر واكتر

امال انتى ليه بما انك مش هتتكلمى على اسعار الحديد جايبه سيرة احمد عز؟

الاجابة ببساطه ان فى حاجة حصلت مؤخرا خلتنى بطنطط واحس ان الشعب المصرى كله بيضرب على قفاه واحمد عز بيطلع لنا لسانه ويفرسنا ويغيظنا

الاعلان الجديد اللى عمله

وهو فى الاول بيقول انه عايز يساعد الشباب المصرى فى انه يبنى بيته حلولى وان احمد عز قال اللى هيقدر يبنى بيته من غير حديد هيديله طن حديد هديه!!

قمه الاستفزاز للشعب المصرى

يعنى بيقولهم انكم مهما عملتوا مش هتقدروا تستغنوا عنى وانكم مجبرين عليا وانى مش هتنازل عن زيادة الاسعار واخبطوا راسكم فى الحيط

لا مناخ مصر والا امكانياتنا بتقول ان فى حد مثلا يقدر يبنى بيت من خشب زى بيوت امريكا مثلا

معناه ايه انه ينزل اعلان زى دا

يعنى هو وصل لدرجه جبروت انه يستفز الشعب المصرى بالشكل دا


انا بس حايه اقوله ان الكبير والقوى فيه اللى اكبر واقوى منه

وان ربنا مبيرضاش بالظلم

وان الله يمهل والا يهمل يا امبراطور الحديد

تحديث هام جدا ياجماعه
اكتمالا لحرقه الدم فى حاجة مكنتش واخدة بالى منها فى الاعلان وجوزى الله يكرمه
حب يأكد عندى حرقان الدم وقالى بصى بصى كاتبين ايه
واذا فجأتن بركز لقيت عز كاتب بالبنط العريض فى الاعلان
اللى هيقدر يشترى حديد من اى شركه تانيه غير حديد عز هديه قيمه طن حديد
لا تعليق انا هسيبكم انتوا تعلقوا

37 comments:

روح said...

حسبنا الله ونعم الوكيل
يمكن سكوت الشعب المصري
وذلة هو اللي وصلة للمرحلة دي
مرحلة اخبط دماغك في الحيط
عشان احنا اللي عودناهم نتحمل
ذلهم ونقول عايزين ناكل عيش
ونربي عيالنا
بس زي ما قولتي القوي في الاقوي منة

bastokka طهقانة said...

الاخطر ان اللي بيحاول يقف قدامه بينسفه

اديكم شايفين عمل اية في هشام طلعت مصطفى و لبسه قضية قتل سوزان تميم علشان حاول يستورد حديد من برة و كان حينافسه

بس انتي قلتيها كلمة حق
ربنا اقوى منه
اوروفوار

الطائر الحزين said...

من احتكر على المسلمين سلعة ليغليها عليهم ضربه الله بالجنون والجذام


كيف حال حضرتك

مشروع انسان said...

يعنى للاسف مفيش فايدة
ورانا ورانا

حسبنا الله ونعم الوكيل

ظنوا ان الحياة لهم
ونسوا او تناسوا ان هناك حياة اخرى

لايظلم فيها ربنا احدا

الربان said...

تحياتي

تفتكري حضرتك هو عز.....و الا عزو...ابن الحكومة؟!!!

تحياتي

انا من اهوى ومن اهوى انا said...

ريــــنا :

مفيش فايدة

حسبى الله ونعم الوكيل

إبنى بيتك ... وهانخرب بيتك

ابنى بيتك ... وإيدينا فى جيبك

إبنى بيتك ...وهانطلع عينك

تحياتى يا رينا

مش عارف اكتب حاجة من حرقة الدم

يا مراكبي said...

أقولك على سر

الحديد سعرة رخص عالميا عن الإسبوع اللي فات بحوالي 1000 جنيه أو أكتر شوية .. حد حس بالموضوع ده في مصر؟ خليه في سرك بقى علشان الرقابة

(المهاجر الى الله) said...

ادعوك لزيارة مدونتى المتواضعة
www.eyuon.blogspot.com
وشكرا

sara said...

بعيدا عن الكلام انتي قولتيه

انا حاسه ان شكله في الصورة اللي انتي حطاها معبر جدا بدون اي كلام


ملحوظه علي جمب
السبحه مستفزاني قوي

بنت الصالحين said...

حسبي الله ونعم الوكيل



ان الله يمهل ولايهمل

وان شاء الله فرجه قريب

وحشتيني علي فكره

والف سلامه علي البرد :))

صاحب المضيفة said...

لا حول ولا قوة الا بالله


ربنا يحفظنا ويختم لنا بخير ويضرب على يد كل ظالم



تحياتي

سندباد said...

طالما اننا شعب مهاود اوي كده علي راي محمد صبحي يبقي نستاهل اللي يحصل فينا
لنا الله انا فعلا شفت الاعلان وقعدت اضحك ضحك هم يضحك وهم يبكي

رفقة عمر said...

رينا اخبارك ايه وحشينى كتير قوى
يارب تكونى بخير

ربنا يهلك الظالمين بالظالمين
ربنا يرحمنا من عنده ويخرج من الدنيا دى على خير

مؤمنه said...

السلام علبيكم ورحمة الله وبركاته

من زمان وانا عارفه مدونتك بس ما كنش عندى اللينك بتاعها

ربك يمهل ولا يهمل هو دى تعليقى

وكل عام وانتى بخير والى الله اقرب وفى طاعته ادوم
ورمضان كريم عليكى وعلينا
والسلام عليكم ورحمة الله وبركاته

جنّي said...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

مجداوية said...

السلام عليكم
كل عام وأنت بألف خير
رمضان كريم


ملحوظة:
أنا من طبعا ضد احتكار أحمد عز وضد أى احتكار لكن الاعلان مش معناه كده الراجل بيكفر عن سيئاته وعايز يحسن صورته فبيدى طنين حديد للشباب زكا عن صحته وعفيته واللى حيشترى حديد من برة حيدفعلة قيمة الحديد اللى اشتراه لكن هو بالكرم الحاتمى ده بيكسر عين الشاب من دول وبيقوله بالزوق يعنى خليك حلو واشتريه من عندى
بس اظاهر من كتر عمايله مش مصدقين انه يعمل كده أو ان ربنا مخلينا نشوف الحلو بتاعه وحش برضه



ياللا
ربنا موجود ورمضان كريم

احساس لسه حى said...

عزيزتى

انا مش عارف هنلاقيها من جبروت مين ولا ميبن ولا مييييييييييييييين فى البلد

من ممدوح اسماعيل

لهشام طلعت مصطفى

لأحمد عز

والقايمة مليانه

من اقل لواء فى الشرطة

البلد باظت وربنا يستر

خلوا الناس بقيت تسرق وترتتشى وده شئ عادى

ما كله بيسرق ...ده المبررر

علشان نعرف نعيش....ده المبرر


تحيا مصر

مش حكومة مصر

تحياتى

كل سنة وانتى طيبة ورمضان كريم

سلاااام

أمــانــى said...

كل عام وانتى بخير ربنا يتقبل منكِ صالح الاعمال يااااااااارب آمــــــــين

كلام حسام said...

تصميم المدونة حالم
واسمها حالم
لما شفت الصورة حسيت انها كلاسيكية اوي
بس واضح ان اتجاه المدونة غير كده خالص
كل عام وانت بخير

romeads said...

مش هقول غير ان لو كان فى حكومة ورقابة جيدة مكنش كل دة حصل ولو مكنش فى استسلام من الشعب مكنش كل دة حصل فاذا كان حاميها حراميها تتوقعى من احمد عز ايه غير الجبروت والظلم دة كله وكان الشعب المصرى لا حق له فى العيش

šσяšαяαα said...

السلاااام عليكممم

ينفع اكمل التعليق واللا امشى من سكات:)

انا عارفه انك زعلانة منى اوى جدا خالص وعندك حق

انا السنادى انقطعت عن نفسى قبل مانقطع عن الناس كلها

بس مفيش حد غالى عندى نسيته وانتى من اول الناس اللى بحبها اوى

يارب تكونى بخير وتكونى دعتيلى لما زرتى الكعبة

ولو الخبر الجميل اللى عرفته دا صح يبقى ربنا يقومك بالسلامة ويباركلكم ويزرقكم بالذرية الصالحة

سلام ياعسولى:)

šσяšαяαα said...

اه صحيح

شفتى المشاعر الجامدة دى غطت على انى اعلق على الموضوع:)

عز ابن وز

مع انه بلدياتى

بس ربنا عالظالم والمفترى واللى بيستعبط عشان يعمل من نفسه راجل كوبارة

ياللا بلاش نخلليهم ياخدو حسنات على قفانا:)

Anonymous said...

أحمد حجر:
حسبي الله ونعم الوكيل

Anonymous said...

يخرب مطنك ياعز دا انت عندك زنوب الدنيا والاخره ايه دا كل الشتائم والانتقاضات يلا ياعم 80000000 مصري بيلعنوا اسلاف اجدادك انا مش منهم انا بقي الزياده علي ال 80000000 مصري مش هاسبك ولا انتقضك لان الموضوع مش في يدي بس حابب اقول لك شئ صدقني لو انت بتموت من العطش والمياه بيدى ساروي بها الارض بدلا من اروي عطشك شوف بقي انت سبب في ايه هتبقي سبب فى دخولي النار تخيل بقى انا لو حالفني حظي السئ ورايت وجهك السمح هاعمل فيك تعرف هاعمل ايه اقولك هاعمل زي ظابط المباحث الي دخل السيخ اياه فى الشاب المصري وحياة رحمة ابويا وامي واجواز خالاتي التلاته ما هاتنازل ابدا ودا وعد مني علشان تعرف المصري الجد لما بيوعد سلا م ياحرنكش

Anonymous said...

الدنيا خربانه بيك من غيرك خربانه يعني لاعز ولا غيره خير البلد سابنا وهيسيبه ويروح على غيره وسمعني البروجي علشان الزحمه

جنّي said...

السلام عليكم


تقبال الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

الراقـــص مع الذئـــــاب said...

السلام عليكم
الاخت الكريمة الي طال غيابها عنا رينا
كل سنة وانتي طيبة يا ستي
مع اني زعلان منك عشان مش بتسألي


اه صحيح...دا انتي سألتي عليا في رمضان
وانا اللي مقصر في السؤال....بس والله ظروف العمل بقي وزنقة الجيش...ما انتي عارفة
ادعيلي اني ربنا يخلصها علي خير
باقيلي سنة
يا مسهل

كل سنة وانتي طيبة وكل اللي عندك بخير وصحة وسعادة يا رينا

جنّي said...

السلام عليكم ورحمة الله وبركاته
عيدكم مبارك
تقبل الله منا ومنكم
وكل عام وأنتم بخير
كل عام وأنتم من الفائزين
كل عام وقد حصدتم الجائزة
كل عام وأنتم ترفلون في ثوب الفرحة
كل عام وانتم مقبولون الصيام والقيام
كل عام وقد عفا الله عنكم في ليلة القدر
كل عام وأنتي منصورة يا أمتي
أخوكم
سعيد

رفقة عمر said...

رينا كل سنه وانت بخير
طمنينا عليكى يارب تكونى بخير والضيف الجديد وصل بالسلامه
ربنا يهنيكى ويسعدك اللهم اميين

Unknown said...

أخييييييييرا لقيت حد بيفهم .. و مش مضحوك عليه

ياااااااه
دانا مرارتي كانت هتتفقع من الاعلان بيحسسك ان الدنيا وردي .. حسبي الله و نعم الوكيل علي كل مفتري

تحياتي

ياسمين

Anonymous said...

حاجة مستفزة والله فعلا

اللهم انتقم من الظالمين


منتظرين جديد تدويناتك والف مبروك وربنا يقومك بالسلامة ويرزقك بالذرية الصالحة

رينـــــــــــا said...

روح
---
والله يابنتى انا مش عارفه الشعب المصرى فى ايده ايه قدام القهر اللى بيعيشه
اللوم الاكبر من وجهه نظرى على السلطه اللى شايفه البرطعه دى وساكته
حسبى الله ونعم الوكيل
00000000000000000000000000000000000
طهقانه
-------
مهو دا اكبر دليل ان خلاص وصل لدرجه ان مفيش حد هامه مهما كان
ومتهيئلى لو جمال مبارك نفسه وقف قدامه هيطلعلوا تيييييت
علشان الرقابه بس
00000000000000000000000000000000000
الطائر الحزين
-------------
مين يسمع ويهتم ويقتنع الفاضل

والله بخير دايما بفضل الله ودعواتكم
00000000000000000000000000000000000
امام الجيل
----------
والا هيبقى فايدة احنا محطوطين زى الفران فى مصيده ومش عارفين نطلع منها
الله المستعان
-----------------------------------
الربان
------
والله فى الحالتين فهو متربى فعلا فى عزهم
نورتنى

رينـــــــــــا said...

انا من اهوى ومن اهوى انا
-------------------------
والله انا كتير بيجيلى حالات يائس واحس فعلا ان مفيش فايدة

وبعدين وهنوصل لايه مش عارفه الحقيقه
نورتنى
00000000000000000000000000000000000
يامراكبى
---------
وحتى لو بئا يوزعوا بره ببلاش على الشعب
هنا هيغلوه زياده ومش هيسمحوا لحد يستورده
نوورتنى
-----------------------------------
المهاجر الى الله
------------
يشرفنى يا فندم
00000000000000000000000000000000000
نان
----
ليه بس يا بنتى
دا دليل على الورع والتقوى اللى احنا مش شايفينه
اصل العلاقه بين العبد وربه دى بالدخليات اوى لكن الخارجى مش مهم خالص
-----------------------------------
عاشقه الفردوس
-------------
انتى كمان وحشانى بجد
الله يسلمك يا قمر
وفعلا حسبى الله ونعم الوكيل

رينـــــــــــا said...

صاحب المضيفه
------------
اللهم امين
مفيش فى ايدنا الا الدعاء ان ربنا يفرج عنا فعلا
00000000000000000000000000000000000
سندباد
-------
عندكم حق فعلا انتوا الاتنين
انا بجد مش ضحكت انا عينى دمعت من القهر والاستفزاز حقيقى
-----------------------------------
رفقه عمر
---------
انتى كمان والله وحشانى اوى سامحينى على تقصيررررررررى
اللهم امين
-----------------------------------
مؤمنه
------
وعليكم السلام
حضرتك نورتينى يا فندم
وانتى طيبه وبخير
وربنا يتقبل منك
وعليكم السلام
-----------------------------------
جنى
___
وحضرتك طيب وبخير
وشكرا على تهنئتك ربنا يكرمك

رينـــــــــــا said...

مجداويه
-------
وعليكم السلام
وانتى طيبه الله اكرم

والله جايز بس بعد حركه برنامج رمضان دقوا المزاهر اتأكدت وتيقنت انه عايز يحاول يصلح صورته شويه ويضحك على البشر بالتلاتين شقه

انا بقوله انت ممكن تكون فرحت 30 شاب وفتاه بس انت اتعست ملايين وقفلت بيوت ناس كتير اوى

نورتينى يا فندم
-----------------------------------
ااحساس لسه حى
-------------
يعنى حضرتك تتوقع ايه لما حاميها حراميها
بديهى جدا ان الرعاه كمان يحاولوا ينهبوا اللى يقدروا عليه

انا دايما لما بشوف اللى بيحصل دا بفتكر سيدنا عمر رضى الله عنه بعد غزوة من الغزوات الغنائم كانت جايه كامله محدش مد ايده على قشايه ولما استغرب وسأل عن دا
قالوا يا امير المؤمنين عففت فعفوا

دا تعليقى الوحيد
-----------------------------------
المجهول
------
شكرا على المعلومات وعلى مشاركتك
نورتنى
-----------------------------------
امانى
------
وانتى طيبه يا جميل وبخير يارب
-----------------------------------
شملولى بن سحلولى
------------------
والله يابنى حال البلد يخلى الاخرص ينطق
مش الرومانسى يبقى وطنى
الله المستعان

رينـــــــــــا said...

romeads
---------
المشكله مش فى الرقابه
المشكله انهم مشاركييييييييييييين معاه فى النهب
دى المصيبه الاكبر

نورتينى
-----------------------------------
صورصارة
--------
يا قمر انت تكمل براحتك
والله انا عزراكى جدا وعارفه اد ايه لما الواحد بيتسرق من نفسه بيتسرق من اللى حواليه
ربنا يكون فى عونك
انا كمان بحبك اوى وياستى بدام فكرانى دا كفايه عندى

والله دعيت لكل صحبه الخير اللى عرفتها هنا

صحيح ياستى وربنا يسمع منك ويتقبل ان شاء الله

ربنا يسمع منك وياخده فعلا
او يهديه

متنسنيش يا قمر
-----------------------------------
المجهول
------
حسبى الله ونعم الوكيل
نورتنى
-----------------------------------
المجهول 2
--------
بجد انا لو مكانه وشفت الغل دا كله جوا بنى ادم واحد بس مش الكام مليون دا
بجد مش هعرف اعيش
ربنا يهديه يارب
-ج---------------------------------
المجهول 3
---------
ممكن يكون عندك حق بيه من غيره خربانه
بس الواحد بيتمنى ينقص واحد منهم يمكن الظلم يقل شويه
-----------------------------------

رينـــــــــــا said...

جنى
---
وانت طيب
ربنا يكرمك يارب
-----------------------------------
الراقص مع الذئاب
-----------------
وعليكم السلام
انت داخل خدوهم بالصوت بئا :D

ماشى يا سيدى ربنا معاك ويقويك يارب
هانت اوى ان شاء الله ربنا معاك

وانت طيب وبخير يارب
-----------------------------------
جنى
----
والله الواحد مش عارف يقول لحضرتك ايه
وانت \يب يارب ويتقبل منك دعائك امين يارب
-----------------------------------
رفقه عمر
--------
وانتى طيبه يا جميل ويسعدك يارب انتى كمان
والله كان بيشاور عقله اليومين اللى فاتوا رغم انى لسه داخله السابع اصلا
بس طلع مؤدب وقرر يتراجع عن رأيه ويستنى شويه
ادعيلى كتير بجد لحسن خلصت بجد

دايما منورانى
-----------------------------------
عاقله على ارض الجنون
00000000000000000000
على فكرة هما مش قادرين يفهموا ان الشعب المصرى مش بيضحك عليه
وان كان ممكن زمان ترميله حته لحمه من الجوع ياخدها ويسكت ويفرح
انما دلواقتى انا اضمنلك مليون الميه ان الشعب المصرى عنده استعداد يموت وياخد حقوقه كامله

اللى فاهمين كتير اوى صدقينى
نورتينى
-----------------------------------
مصراوى اوى
----------
حمد الله على السلامه يا دكتور
ومبارك ليكم انتم كمان وربنا يتممها على خير يارب
ومنتظرين احنا كمان جديد تدويناتك
نورتنى يا فندم

 
© 2008 *By Templates para Você*