وردة - بنلف نلف

فايزه أحمد - بكره تعرف يا حبيبي

فايزه أحمد - بكره تعرف يا حبيبي

حقاَ

جل فلا يُخفى، ودق فلا يُرى، وهو كامن في الحشا كون النار في الصفا إن قدحته أوري وإن تركته توارى

أحلام مستغانمي / أبداً لن تنساني.m4v

قـــلــبــي كــالزجــاج المــكــســور

أنت

دائما انت فى المنتصف !!!

انت بينى وبين كتاباتى ...

بينى وبين فراشى...

بينى وبين هدوئى...

وبينى وبين الكلام...

ذكرياتك سجنى..

وصوتك يجلدني..

وأنا بين الشوارع وحدى

..بين المصابيح وحدي

أتصبب بالحزن بين قميصى وجلدي

ودمى...قطرة -بين عينيك-ليست تجف!

فامنحنى السلام

امنحنى السلام

أمل دنقل

واااجب لابد منه

بما انى قبل كدا اول اجازة نزلتها مسحت بكرامه المطار الارض لانه كان سىء جدا والمعامله زى الزفت وكل حاجة كانت تعصب وتنرفز وبما انى بردوا قلت الكلام دا هنا وفى كل حته وفضحتهم فضيحه بجلاجل لقيت ان واجب عليا بردوا لما شفت المطار الجديد انى ادخل واقول ان الموضوع متغير يا جدعان المطار نضيف وزى الفل ومرتب والاجراءات سهله والشنط مبتترماش فى الارض وكل حاجة كانت بمبى بمبى

والجميل اكتر ان الناس بتضحك فى ووووووووووووشك ومش رااااااااااااضين ياخدوا اكرامياااااااااااااات

دا اللى فاجانى الصراحه

والا المعامله ياخواتى فل الفل واحترام اخر حاجة احساسات ما بعد الثورة بقى ياشباب

رغم انى هنا بقالى شهر اهو والا حاجة بس كنت مترددة اكتب الكلام دا صراحه يعنى غيظا من ابو بلوفر بس فكرت وقلت كدا ان دى ديكتاتوريه وخليكى يابت منصفه

مجهود يشكر عليه

بس دا مش معناه انى ممكن افكر ارشحه للرياسه ابداااااااا

اصلى مبحبش البونبونى

صورة المطار

للاسف

أشتقت اليك فعلمنى ان لا اشتاق

عملنى كيف اقص جذور هواك من الاعماق

علمنى كيف تموت الدمعه فى الاحداق

علمنى كيف يموت القلب وتنتحر الاشواق

يارب مليش غيرك يارب ساعدنى

هو دا

لن نفترق...ولن نلتقى ابدا

فلسفه راقيه ...لكنها موجعة

..!احيانا نفقد اشخاصا..... للابد

ليسوا امواتا...لكن.!!

!!ماتت فيهم الصفات القديمه التى احببناها

شخبطات

عمر الكبرياء عندى

اطول من عمر الحب

ودوما كبريائى

يشيع حبى على "قبره"

لا تعد فحبى ليس مقعد فى حديقه عامة

تمضى عنه متى شئت...

وترجع اليه فى اى وقت

لا تعتذر

فالرصاصه التى تطلق لا تسترد

حاولت ان تجعل منى

اميرة فى قصرك الثلجى

لكننى فضلت ان ابقى

صعلوكه فى بربرى حريتى

هل فى صدرك موضع لطعنه...وقد غطت صدرى الطعنات

حتى غابت ملامحى...ومازلت ابحث فى وجهك عما أحببت فيك

ولازالت احلم ببقايا ملامحك...وكأنك كنت صنعا من خيالى

حلما...صنعته بجنون...وتبدد بجنون اكبر

فلتذهب انت وقيس الملوح وعنترة الى النسيان

لقد حزنت لاجلك اكثر مما يليق بانسانيتى...وانانيتى!

اريد ان اقول لك احببتك لاننى اخترت ان أحبك

وسأكف عن حبك حين يحلو لى

وقد كففت..! وقد أتذكرك احيانا

غادة السمان

هابى بارث داى

كل سنه وانتى طيبه يا رينا يا رورى يا ريرى يا أرأر يا أرأوره يا نونو

طوله

العمر كدا يارب فى طاعته

كل سنه وانت طيب يا

بلوجى يا حبيبى يا نور عينى انت احلى حاجة ان انا وانت فى يوم واحد اتولدنا بس انا بقال كام وعشرين سنه كدا وانت يادوبك بقالك 4

سنين بس

ياتى صغنن لاف يو

تعالى بقى ناكل التورته دى انا وانت لاهو انت مقولتليش انت بتحب الجاتوه شوكلت والا

كريمه زي

اكيد زى صح حتى لو مش زى هتاكلها بردوا

عندى حاله ملل

احساس متملكنى اوى بقاله فترة حلوة كدا انى يتيمه ووحيدة اوى رغم ان حواليا ناس وفى ولادى وجوزى بس الغربه اللى انا عايشه فيها والناس المفروضه عليا بحكم انى لوحدى ومضطرة يكون فى حياتى حد لمجرد انى مبقاش لوحدى طول الوقت عدم اختيارى للناس لان اصلا معرفش ناس محسسسنى بضيق فظيع مفيش حد من اللى حواليا انا بتكلم معاه رينا اللى بتتكلم معاه رينا الحقيقيه الانسانه اللى هى انا انا مفيش حد بيسمعها كله جوايا لكن رينا اللى من برة اللى بتتكلم فى العموم اللى بتعيش واقعها وخلاص هو دا اللى موجود وبس

مشاعرى مكبوته انفعلاتى اسرارى كله جوايا اوى والحمل زاد اوى عليا حتى انا عماله افكر انا ليا صحاب اتجرد قدامهم تماما من كل اللى جوايا بدون خوف او قلق من غير ما اتكسف او أفكر ممكن يقولوا جواهم عليا ايه مفيش هما اتنين واحدة فى مصر وبحكم اننا بعاد مبقناش زى الاول والكلام بينا مش طول الوقت بحكم مسئوليتها ومسئولياتى وطبع الحياه اللى بياخدنا وزحمتها ومحدش فاضى لحد والتانيه بقى للاسف الكلام بينا مش متاح طول الوقت لظروف ما

جوزى بيحبنى وبيفهمنى بس بيفهمنى من وجهه نظره هو ودماغه هو مش بيحط نفسه مكانى او بيفكر بدماغى ولما نتناقش فى حاجة مضايقنى او موضوع جوايا ممكن النقاش فى الاخر يتطور الى زعل وببقى انا الخسرانه وبشيل جوايا اكتر مبخرجش اللى جوايا بكامل طاقتى

غير بقى ان الناس المفروضه عليا مضايقه منهم اووووى احنا غير بعض تماما مختلفين كليا وجزئيا مش قادرين نكون اصحاب والا هنقدر وحتى لو هما لانهم قرايب فبيبقى الموضوع حساس ولازم تفكر الف مرة قبل ما تتكلم

اتخنقت اوووووى اوى بجد الموضوع داخل معايا فى سكه انعزاليه

الغريب ان كل اللى حواليا بردوا شايفين انى لطيفه واجتماعيه بس دا من برررررره لكن من جو لا انا من جوة مش اجتماعيه خالص بحاول ابقى من جوة وبرة بس مش عارفه

فى حواليا ناس بجد بحبهم بس مش عارفه اكون معاهم انا زى ما انا وفى ناس كمان مبهحبهمش ومجبورة انى اتعامل معاهم بلطف وزوق

انا عارفه ان المفروض ان ميبقاش عندى وقت للكلام دا كله وانى عندى مسئوليه تهد جبال بس دا مش قادر يمنعنى انى مضايقش انى لوحدى اوى كدا احساس زفت اوى الصراحه

كل انسان بيحتاج ان فى يكون معاه صديق وفى فى وقت الفرح فى وقت الشدة فى وقت حزن

يمكن وقتى محتاج يتملى اكتر من كدا جايز

يمكن انا مأفورة الموضوع جوايا وانى انا اللى مش قادرة اتعامل او بدور على سوبر هيومن مش موجود اصلا جايز بردوا

يمكن داخل عليا اكتئاب اوا انا اصلا فى حاله اكتئاب من بدرى والمواضيع بتتأجج جوايا حتى لو صغيرة

بس كل اللى انا حاسه بيه اوى

انى مش مرتاحه

وعايزة الاحساس دا يخلص بسرعه لانه متعب اوى

ومقرف

المشكله انى بردوا دايما اختياراتى غلط يعنى المصيبه كمان انى من كتر ما اتبهدلت بخاف اختار تانى غلط فتصدم تانى فدا بيخلينى انعزاليه اكتر فبتعب اكتر فكتئب اكتر

مش عارفه الكلام جوايا كتيييييييييييييييييييييييييييييييير ولسانى خلاص مش عايز ينطقه والا ايدى مطوعانى اكتب اكتر

احلى حاجة ان البلوج بقى مهجور يمكن هو دا اللى يبقى فى الاخر ملاذى الاخير

عودنا

طبعا كالعادة بلف الف وارجع تانى للمكان دا مش قادرة والا عارفه انسلخ منه وانساه وكأنه مش موجود بدخل واتابع فى صمت واقرى كل البوست كأنى بقرا لحد تانى بقول انا حد تانى مش نفس الحد اللى كان بيكتب

يمكن كبرت والمسئوليه غيرتنى يمكن بقيت حد تانى فعلا بسبب الغربه والحاجات اللى بعيشها بس فى الاخر بحس ان دا المكان الوحيد اللى بتاعى انا لوحدى المكان اللى محدش شاركنى فيه غير قلمى ومشاعرى وعقلى

بحب البلوج دا اوى و معتقدتش انى هقدر فى يوم من الايام انى اهجره للابد اه بغيب اووووووووى وكتير جدا بس بلف الف وارجعله وهو واحشنى وبيوحشنى فيه كل ذكرياته فرحه وقساه

يمكن الفترة اللى فاتت بعدت بسبب المسئوليه الكبيرة اللى ربنا كلفنى بيها

بسبب الفبيس بوك اللى نط فى حياتنا كلنا وملىء حيز مش بطال من وقتنا فيه

بس قررت ارجع تانى وان شاء الله ان شاء الله مش هغيب كل المدى دى تانى ابدا

عندما أفكر

عندما أفكر ان اكتب اليك قصيدة

فانها فكرة جنونبه

وابحار بين المستحيل

والما فوق المستحيل

وخوض فى معركه لا تنتهى مع حروف الابجديه

وخروج عن قانون الكلمات

وحتى استطيع ان اجد عنوان للقصيدة

فاسمح ليه ان استغرق بضع قرون

فانت ياحبيبى

اللغه

انت الجمال

انت العشق

انت النسيان

انت الثورة

انت الهذيان

فارجوك اعذورنى عن كتابه القصيدة

بلا كلمات

لان كلمات القواميس مات

لان كلام المكاتيب مات

لان كلام الروايات مات

اريد اكتشاف طريقه عشق

احبك فيها بلا كلمات

نزار قباني

alone

عارف لما تكتشف فجاة انك انسان فاشل فى كل علاقاتك الاجتماعية وان نادر اوى ان علاقتك تنجح مع حد اكتشفت فجأة انى مليش صحاب تقريبا من يوم ما بدأت عينى تتفتح كدا وافهم يعنى ايه صحاب او اصدقاء بمفهومى الخاص بيا انا وانا كل علاقاتى بتفشل ...كل الناس اللى كنت فكراهم صحابى او قريبين منى مطلعوش كدا معرفش ليه بيتحولوا عليا فجأة وكاننا منعرفش بعض او يمكن ببئا عرفاها بس مش بتخيل انها ممكن تعمل معايا اللى بتعملوا فى الناس
انا مستنتجه من الكلام دا ان العيب فعلا فيا انا مش فى الناس اللى حواليا او يمكن اختياراتى كلها كانت غلط وانى بشوف الناس كلها طيبه واحسن منى وبحاول احافظ على صداقتهم وبحاول اكون مثاليه لاقصى حد ومزعلش حد منى واتعامل من قلبى اوى وبقلب مفتوح
عمري ما مثلا مثلت على واحدة من الناس دى حاولت ابين انى بحبها مثلا وانا فى قلبى شىء غير لا اللى بزعل منه بقوله انا زعلانه واللى بحبه بيبان عليا اوى انى بحبه فى كل تصرفاتى معاه
طبعا انا مش ملاك واكيد اكيد فيا حاجات كتير هما استحملونى فيها ويمكن هى دى اللى بتخليهم فى الاخر يكتشفوا انهم مش قادرين يتعايشوا معايا بيها
واخيرا بجد اكتشفت ان احسن حد يكون صديق ليك هما اتنين الوحدة ونفسك... ناس كتير زعلانه انها وحيدة وان ملهاش صحاب وانها عايشه لوحدها والله بجد كدا احسن الف مرة احسن ما تحبى حد اوى وتتخزوقى فيه ومش مرة والا اتنين لا ميه مرة ويسلام بئا لو انتى زى مبتتعلميش وكل مرة ماشاء الله تتخزوقى عادى جدا
زمان كنت بحس انى مقدرش اعيش لوحدى وان لازم حد بحبه يكون معايا وبالذات كمان انى بنت وحيدة معنديش اخوات بنات فكنت مفتقدة الشعور دا اوى بحاول اخرجه مع اى حد يمكن دا اللى وقعنا فى الاختيارات الغلط اللى اختارتها فى حياتى
بس دلواقتى حاسه انى كدا مرتاحه اكتر مفيش حد شايله همه غير نفسى وولادى وجوزى دول كفايه عليا اوى
مفيش حد خايفه عليه والا بفكر فيه ياترى عمل ايه وسوي ايه
مش بسمع مشاكل من حد والا مهتمه اعرف اخبار اى حد لوحدى انا ونفسى حاسه ان كدا اريحلى بكتير
انا عشمانا فى ربنا ثم فى بناتى الحمد لله ربنا رزقنى ببنتين زى القمر بدعى ربنا انجح فى صداقتى معاهم و متجرحش تانى لان بجد اصعب حزن وجرح فى الدنيا هو انك تتجرح من حد بتحبه اوى
ربنا يستر ومفشلش معاهم هما كمان

على فكرة انا مش كاتبه النوت دا بندب على نفسى وحظي لقدر الله والا بحنن قلب الناس عليا علشان يقولوا مسكينه والا انى الاقى اللى اصعب عليه ويقرر بئا يصاحبنى والا الكلام الفارغ دا خالص... انا مرتاااااحه كدا والحمد لله جداانا كتبت لانى اولا وحشنى بجد انى اكتب فى مدونتى ثانيا كلمتين كانوا جوايا قررت اخرجهم مع نفسى فى مكان انا بحبه بما انى هنا مفيش مكان بحبه اقدر اختلى بيه واطلع فيه اللى انا عايزاه هنا مكانى المفضل لحد ما ارجع مصر ان شاء الله واقدر اروح كل حته بحبها

حمد الله على سلامتى

الحمد لله

ربنا من عليا

باأحلى بنتين فى الدنيا

عقبال كل البنات يارب

لما الشتا يدق البيبان

لما الشتا يدق البيبان

لما تنادينى الذكريات

لما المطر يغسل شوارعنا القديمة والحارات

ألقانى جايلك فوق شفايفى بسمتى

كل الدروب التايهة تنده خطوتى

كل اليالى اللى ف قمرها قلبى بات

مش جاى ألومك ع اللى فات

ولا جاى أصحى الذكريات

لكنى باحتاج لك ساعات

لما الشتا يدق البيبان

كنا طفولة حب لسه ف أوله

بنضم بايدينا الحنين وبنوصله

خريف ندانا والشجر دبلان

بردانة كنتى وكنت انا بردان

ضمت قلوبنا بشوق ولهفة نبضها

لما التقينا الخطوة عرفت أرضها

أجمل معانى الحب غنتها النايات

مش جاى ألومك ع اللى فات

ولا جاى أصحى الذكريات

لكنى باحتاج لك ساعات

لما الشتا يدق البيبان

تتصورى

برغم اننا شايفين طريقنا بينتهى

..تتصورى

لا عمرى حاقدر ع الفراق

ولا انتى عمرك تقدرى

تتصورى

لسه حنينى بيندهك رغم البعاد

ولسه زهرة حبنا بتطرح معاد

لكن بيغرق حلمنا ف بحر السكات

مش جاى ألومك ع اللى فات

ولا جاى أصحى الذكريات

لكنى باحتاج لك ساعات

لما الشتا يدق البيبان

على الحجار

دايما الشتا والمطر بيفكرنا بذكرياتنا ..مش شرط ابدا تكون ذكريات زى ما الكلمات بتقول عن حب كان

لكن ذكريات الطفوله الجميله والمدرسه والبيت والبليله السخنه الصبح قبل المدرسه ومريله المدرسه ..ايام الجامعه واصحابك وايام الامتحانات والمذاكرة

بجد مفتقدة اوى كل دا...الشتا دا اجمل حاجة فى الدنيا بجد

حديد عز

انا مش هتكلم عن زيادة الحديد لان متهيئلى الناس صوتها اتنبح فى الموضوع دا

مش هنكر طبعا ان موضوع زيادة الحديد دا استفزنى ومستفزنى لحد دلواقتى وكل ما بنفكر نسأل على اسعار الشقق فى مصر بستفز اكتر واكتر

امال انتى ليه بما انك مش هتتكلمى على اسعار الحديد جايبه سيرة احمد عز؟

الاجابة ببساطه ان فى حاجة حصلت مؤخرا خلتنى بطنطط واحس ان الشعب المصرى كله بيضرب على قفاه واحمد عز بيطلع لنا لسانه ويفرسنا ويغيظنا

الاعلان الجديد اللى عمله

وهو فى الاول بيقول انه عايز يساعد الشباب المصرى فى انه يبنى بيته حلولى وان احمد عز قال اللى هيقدر يبنى بيته من غير حديد هيديله طن حديد هديه!!

قمه الاستفزاز للشعب المصرى

يعنى بيقولهم انكم مهما عملتوا مش هتقدروا تستغنوا عنى وانكم مجبرين عليا وانى مش هتنازل عن زيادة الاسعار واخبطوا راسكم فى الحيط

لا مناخ مصر والا امكانياتنا بتقول ان فى حد مثلا يقدر يبنى بيت من خشب زى بيوت امريكا مثلا

معناه ايه انه ينزل اعلان زى دا

يعنى هو وصل لدرجه جبروت انه يستفز الشعب المصرى بالشكل دا

انا بس حايه اقوله ان الكبير والقوى فيه اللى اكبر واقوى منه

وان ربنا مبيرضاش بالظلم

وان الله يمهل والا يهمل يا امبراطور الحديد

تحديث هام جدا ياجماعه

اكتمالا لحرقه الدم فى حاجة مكنتش واخدة بالى منها فى الاعلان وجوزى الله يكرمه

حب يأكد عندى حرقان الدم وقالى بصى بصى كاتبين ايه

واذا فجأتن بركز لقيت عز كاتب بالبنط العريض فى الاعلان

اللى هيقدر يشترى حديد من اى شركه تانيه غير حديد عز هديه قيمه طن حديد

لا تعليق انا هسيبكم انتوا تعلقوا