لما الشتا يدق البيبان
لما تنادينى الذكريات
لما المطر يغسل شوارعنا القديمة والحارات
ألقانى جايلك فوق شفايفى بسمتى
كل الدروب التايهة تنده خطوتى
كل اليالى اللى ف قمرها قلبى بات
مش جاى ألومك ع اللى فات
ولا جاى أصحى الذكريات
لكنى باحتاج لك ساعات
لما الشتا يدق البيبان
كنا طفولة حب لسه ف أوله
بنضم بايدينا الحنين وبنوصله
خريف ندانا والشجر دبلان
بردانة كنتى وكنت انا بردان
ضمت قلوبنا بشوق ولهفة نبضها
لما التقينا الخطوة عرفت أرضها
أجمل معانى الحب غنتها النايات
مش جاى ألومك ع اللى فات
ولا جاى أصحى الذكريات
لكنى باحتاج لك ساعات
لما الشتا يدق البيبان
تتصورى
برغم اننا شايفين طريقنا بينتهى
..تتصورى
لا عمرى حاقدر ع الفراق
ولا انتى عمرك تقدرى
تتصورى
لسه حنينى بيندهك رغم البعاد
ولسه زهرة حبنا بتطرح معاد
لكن بيغرق حلمنا ف بحر السكات
مش جاى ألومك ع اللى فات
ولا جاى أصحى الذكريات
لكنى باحتاج لك ساعات
لما الشتا يدق البيبان
على الحجار
دايما الشتا والمطر بيفكرنا بذكرياتنا ..مش شرط ابدا تكون ذكريات زى ما الكلمات بتقول عن حب كان
لكن ذكريات الطفوله الجميله والمدرسه والبيت والبليله السخنه الصبح قبل المدرسه ومريله المدرسه ..ايام الجامعه واصحابك وايام الامتحانات والمذاكرة
بجد مفتقدة اوى كل دا...الشتا دا اجمل حاجة فى الدنيا بجد
22 comments:
احب الشتا جدا والمشى تحت المطر
كيف حال حضرتك
انا كمان بحب الشتا جدا..رغم اني وانا صغيرة كنت بحب الصيف عشان بنزل البحر :D
وامي كمان بتحب الشتا
البت مون بتكره الشتا بقي جدا ..بيجيب لها اكتئاب ..عايزين نبقي نعالج الموضوع دا
رينا لعلك بخير
الشتاء جميل لولا ذلك الخريف قبله
رينا اختيار الاغنيه جميله
وانا كمان باحب الشتا جدااا
باحس بيه بلمتنا اكتر كان الصيف بيفرقنا والشتا كان بيجمعنا لان المطر كان بيحبسهم اجبارى فى البيت
غير ذكريات المدرسه والاصحاب
ولما التزمت باحس ان العباده فيه احلى لان الحر بيخليكى تكونى عاوزة تخرجى من الصلاه بسرعه
الحمدلله انك بخير
كل سنه وانت دايما بخير
السلام عليكم ورحمة الله وبركاته
ازيك يا رينا اخبارك ايه
انا بقي مش بحب الشتا ، الشتا كفصل وبرودة جو ونوم من العشا
اما المطر نفسه فابحبه جدا جدا
عارفه الاسبوع اللي فات كان عندنا مطره فظيعه غرقت الدنيا وكانت بتشتي تلج كتل يابنتي والله اد مكعبات التلج اللي بنعملها في الفريزر وكانت بتتدافع بطريقه قويه جدا ، خرجت البلكونه اتفرج وبقيت مبسوطه جدا
ربنا يرجعك بالسلامه
قريت البوست امبارح قلت شتا ايه بس اللي دق...جاي اعلق دلوقتي الجو بيمطر ونازل رخ يبقي فعلا الشتا بيدق البيبان
طبعا بحب الشتا وبحب امشي تحت المطر بس للاسف الشوارع في مصر بتتأثر جامد بالمطر دي العقبة الوحيدة
وكنا بنغيب لما الجو بيمطر يمكن دا اللي كان رابط عندي المطر بالسعادة رغم اني كنت متفوق بس ما كنتش بحب المدارس
كلنا مستنيين الشتا بفارغ الصبر بالذات هنا
وفي البلد دي
وحشتيني على فكرة
تصدقى بالله والله جد
انا بسمع الاغنية وفتحت البلوج هنا لقيتك منزلة الاغنية لما الشتا يدق البيبان ، مصادفة عجيبة وغريبة
لية الشتا دايما مرتبط معانا بذكريات
واحلام تاهت مننا فاتت وراحت ؟
برغم حبى للشتا الا ان الحنين جواة مالوش حدود لذكريات حزينة
تحياتى
هههههههههه
زي ما قال مصراوي كنت بحب المطر
وبالاخص السيول عشان هنغيب من المدرسة
وبصراحة اكتر حاجة بحبها في الشتا
هو النوم بيكون متعة فيه
لكن غير كدة بالنسبة لي تعذيب طبعا
وبالذات لما كانت
محاضراتنا الصبح الساعة 8
كان الصحيان من الونم قمة التعذيب
وحشتيني يارينا ووحشتني كل المواقف اللي
مرينا بيها مع بعض رغم صعوبتها
بس كنا مع بعض بنهون علي بعض
خلي بالك من نفسك
وخلي بالك من عتريس ربنا يجيبه بالسلامة
بحبك في الله
لما الشتا يدق البيبان
نقوله رن الجرس على إيدك اليمين
كل شتا وانتي طيبه
وحشتيني على فكرة
من ساعة ماحطيتي الاغنية
والمنطقة العاشرة متبهدله
:D
اخبار الواد زقلط ايه مش ناوي يجي بقى
الشتا حلو
بس مش في مصر
محمد سمير
اجمل ما في الدنيا الشتا
انا مكنتش بحب الشتا وحبيتة من كلمات الاغنية
واحب امشي تحت المطر عشان محدش يشوف بكاي
دة انا لما ببمشي ويا نور القمر وبكون شيفاة
وحيد حزين فوق في السما وسط النجوم بيحكي ماساة
في يوم من ايام الشتا سمعت غناة
وكانت الريح بتعزف اعذب الالحان
دة انا سمعت اغاني الشتا ومواويل احزان
اتخرست والكلام مليني فدخلت للمدونات باحثة عن الكلام
الطائر الحزين
-------------
مين مش بيحب الشتا بس
والله دا اجمل حاجة ربنا رزقنا بيها
والله الحمد لله كله تمام دعواتك
-----------------------------------
none
----
انتى هتقوليلى على البحر )) ))
انا مستغربه جدا الوضوع دا
بس هى مون كدا دايما متفردة((
-----------------------------------
عصفور المدينه
-------------
والله الحمد لله دعواتك
الحمد لله على اتفاق الجميع على حب الشتا
مطلعتش مجنونه :D
-----------------------------------
رفقه عمر
--------
هههههههههههههههه حلو موضوع الحبس الاجبارى دا
اكتشفت له فايدة جديدة تصدقى
ايوة هى الذكريات الجميله دى يابنتى والله
طمنينى عليكى
وانتى بخير يا قمر
-----------------------------------
خمسه فضفضه
----------
وعليكم السلام ورحمه الله وبركاته
والله الحمد لله انتى ايه اخباراتك
المطر وما ادراكى المطر وجماله
تلج او ميه بيبعث فى النفس سعـــــــــــادة
مصراوى اوى
----------
علشان تعرف بس انى بشم ريحته من بعيد :D
فى مصر فعلا الشوارع بتبقى طين بتقرف تمشى فى الشارع
ياساتر على المصالح :P
-----------------------------------
ياسمين
------
شوفتى بئا مستنتيش كتير تانى يوم على طول مطر لمدة اسبوع :D
وانتى كمان يا لولو
-----------------------------------
انا من اهوى ومن اهوى انا
------------------------
لا اله الا الله
سبحان الله :D
هو انا بحس ان كل فصل له ذكرياته
بس يمكن الشتا اكتر لان نشاطنا فيه كان اكبر
مدرسه ومذاكرة ومطر
غير الصيف حر وبحر بس
-----------------------------------
روح
---
اه طبعا الدفا تحت البطانيه تك تك تك تك
انتى كمان وحشانى
وانتى كمان يا لولو
احبك الله
-----------------------------------
ابو امك
------
كركركركر
وليه مش الشمال
ياسمين
-------
وانتى طيبه
وانتى كمان
اى خدمه
البت زقلطه بتسلم عليكى
وبتقولك شويه وخلاص هتنور الدنيا:D
---------------------------------
غمض عنيك
--------
هو فى كل الدنيا
حتى فى اوربا بالتلج اللى بيبقى مغطى الدنيا
---------------------------------
t3ban
-----
بالظبــــــــــــــط
---------------------------------
دلو مرة ثانيه وجرح تانى
-----------------------
بذمتك حد ميحبش الشتا والمطر
ايه بس الكلام الجامد دا
بعد الشر عليكى من الخرسه :D
نورتينى
السلام عليكم ورحمة الله وبركاته
كيف حالك ؟؟
اتمني ان تكوني بخير
وتقبل الله منا ومنكم
وكل عام وانتم بخير
انا كمان بعشق الشتا دة انا كمان مولودة فيه
المهم انتي ازيك؟
الأستاذة/ رينـــــا
صاحب مدونة / كان حلم في ليلة صيف
" تحية طيبة" وبعد..
اعتذر عن الخروج من موضوع التدوينة، ولكنني ليس لدي أي وسيلة لمراسلتك فلم تشر لبريدكم الإلكتروني عبر المدونة أو أي وسيلة اتصال أخرى، أرجو من سيادتك مراسلتي عبر بريدي الإلكتروني shimoo_771@yahoo.com توضح فيها بريدك الإلكتروني واسم المدونة حتى يمكنني مراسلتك ذلك لأنه وقع الاختيار على مدونتكم كأحد مفردات العينة المختارة من مجتمع المدونات المصرية والتي أسعى لجمع بيانات ومعلومات عنها واللازمة لرسالتي المسجلة بقسم المكتبات والمعلومات والوثائق، كلية الآداب، جامعة القاهرة تحت عنوان "المدونات المصرية على الشبكة العنكبوتية العالمية مصدراُ للمعلومات: دراسة تحليلية " من إعدادي "شيماء إسماعيل عباس" وتحت إشراف الأستاذة الدكتورة "يسرية عبد الحليم زايد" أستاذ المكتبات والمعلومات بالقسم.
أرجو الاهتمام والرد سريعا ومراسلتي لمعرفة مدي موافقتك أم لا على الإجابة عن استمارة استقصاء البيانات – استبيان- عن المدونات المصرية.
تحياتي وتقديري
شيماء إسماعيل
باحث ماجستير- كلية الآداب جامعة القاهرة.
Post a Comment