هذة هى حياتى....هذا هو دينى

انا عايزة اتكلم انهاردة فى موضوع لفت نظرى اوى فى رمضان فى التليفزيون وطبعا تحديدا على الفضائيات واكثر تحديدا على قنوات السعوديه و دبى

عبارة عن سلسلة اعلانات بعنوان هذة هى حياتى...هذا هو دينى وسلسه اعلانات دبى العطاء

انا هتكلم عن كل سلسة لوحدها

السلسله الاولى هى اعلانات هذة هى حياتى هذا هو دي

السلسه دى عبارة مجموعه اعلانات بتشجع الناس على فعل الخير فى رمضان بطريقه تشجيعيه جميله اوى وكمثال مثلا لا الحصر

شاب يرتدى ملابس عاديه كاى شاب نازل فى الاسانسير ويوجد حارس العقار نراه يذهب لمحل شراء ليشترى قميص فتعتقد انه يريد ان يشترى له ويختار احدى القمصان ولكنه بمقاس كبير جدا

ونراه فى مشهد اخر نازل فى الاسانسير يرتدى بدله ولكن لا يرتدى القميص فنجد ان من يرتديه هو حارس العقار ويسلم عليه ويقول رمضان كريم والحارس فرح جدا بالقميص

اعلان فى منتهى الجمال وبيفكرك بالناس دول وانك ممكن تسعدهم وتكسب ثواب فى الشهر الفضيل دا

اعلان اخر اتنين من الشباب وقت الافطار بينظروا من البلكونه ويروا رجل عجوز فقط يضع تمر وماء ويجلس الشباب على مائدة الطعام فى حاله حزن ولكنهم يقرروا ونرى انهم يأتوا به ليقوم بالافطار معهم على نفس المائدة وسط العائله

نموذج رائع ومحدش فكر ان ازاى ممكن يحس الغلبان دا وهو بيفطر وسط عيله واد ايه هو محروم من دا

سلسه اعلانات قويه جدا جدا وبتجدد الافكار الدعويه بحثت على النت علشان اعرف مين ممولها للاسف مفيش اى حاجة عنها خااااالص بس اعتقد ان مموليها رجال اعمال السعوديه

اد ايه جميل لما يكون فى اعلانات توضح اسلامنا وانه دين سلام وخير وحب مش دين ارهاب وتخريب وان شبابنا لسه فيهم الخير وبيساعدوا اخوانهم المسلمين والفقراء بجد شىء رائع وجميل جزاهم الله الف خير

السلسله التانية هى سلسه اعلانات دبى العطاء

ياترى مين ممولها يا رجاله

امممممم تخيلوا ان الممول هو سمو الشيخ محمد بن راشد آل مكتوم ...امممممممممم طيب ما علينا طبعا انتوا عارفين انه نائب رئيس دوله الامارات

مااااااعلينا

المهم الاعلانات دى عبارة عن مقارنه بين امرين فالاعلان ينص على انت تختار كوب من القهوة بى 20 درهم وبى 20 درهم وجبه طعام لى 14 طالب وهكذا انت تختار ادوات تجميل بى 500 درهم وبى 500 درهم دفع قسط مدرسى لطالب

هى حمله قام بها سمو الشيخ لمحو الاميه فى البلاد الناميه وكانت ماشاء الله فى وقتها بالظبط فى رمضان وهدف جميل وتلاقى مثلا ان دراهم انت بتشرب بيها قهوة ممكن تستغنى عنها بتدفع بيهم 14 وجبه لتلامذة طبعا ثواب كبير ورائع

كما الاعلانات اخراجها تحفه وتقنيه عاليه وغير ممله وبتجذب الانتباه جدا

والله كنت سعيدة اوى اوى بالاعلانات دى حسيت انه يااااا دا فى ناس بقت تهتم بالخير وبيصرفوا عليها وبيختاروا الاوقات الصح

حتى لو حساباتهم تجاريه فى جانب ايجابى بيتحقق افكار جديدة ابواب خير اكتر

دا سايت الحمله اللى نفسه يساعد وياخد فكرة عنها

http://www.dubaicares.ae/arb/default.asp

طبعا لما اتفرجت على الاعلانات دى على اد ما اتبسطت جدا حزنت اوى اننا فين من كل دا

فين الاعلام المصرى احنا اعلانات بتكون عبارة عن رقص وعرى وتنطيط وبس حتى فى رمضان سبحان الله بيعلنوا عن الخيم الرمضانيه

تعالى قارن بين القنوات المصريه والفنوات دى طبعا انا مش بقول ان هما شيوخ واحنا مش عارف ايه اكيد مش للدرجه دى بس المفروض ان الاعلام المصرى يعيد حساباته على الاقل فى رمضان المفرووض ان كان لينا الريادة....... والغريييييييييييييييب ان اللى متولى الحمله

هو صاحب السمو نائب رئيس الدوله :(

على العموم هى سلسله اعلانات خيريه رائعه عجبتنى وحبيت اشاركم فيها وان شاء الله احنا كمان فى مصر نعمل زيها او على الاقل تتوحد الجهود والحملات دى لو اتعملت صح والله ان شاء الله مش هيكون فى فقراء فى البلاد لانها مؤثرة واكبر دليل ان رجال الاعمال بدوأ يشاركوا فيها

تحياتى